PLANEA: Sesión 3 ✍️ 🔑🛎️📦

Seguimos avanzando no proxecto cunha terceira sesión na que a atención, a creatividade e a expresión oral cobraron especial protagonismo.

No primeiro espazo, comezamos cun pequeno quecemento corporal e retomamos o xogo de pasarnos o obxecto cuberto mantendo o contacto visual. Nesta ocasión, o pase realizouse de maneira libre, sen orde establecida, o que esixiu maior atención e conexión co grupo.

Aínda que o programa contempla introducir dous obxectos cubertos nesta sesión, decidimos manter un único, xa que o propio lanzamento e a escoita activa supoñen un reto axeitado para o alumnado. A segunda cubrición incorporarase máis adiante.

Nesta parte tamén puxemos o foco na creatividade da linguaxe oral, propoñendo pequenas consignas que favorecesen unha expresión máis imaxinativa. No noso caso, xogamos a dicir sabores de xeado, o que deu lugar a respostas moi orixinais e a unha expresión afastada do convencional, potenciando a espontaneidade e a inventiva.

Antes de cambiar de espazo, explicamos as modificacións da seguinte proposta, na que introducimos un novo elemento: un obxecto sonoro.

No segundo espazo, retomamos o traballo por parellas e incorporamos o son á dinámica. O xogo pasou a estar acompañado por un axente externo (campá/obxecto sonoro), que esixía unha maior coordinación e atención compartida.

Ao son da campá, pechamos esta parte da sesión e pasamos ao terceiro espazo, onde continuamos ampliando o noso mural colectivo. Como en sesións anteriores, traballamos sobre o mesmo rolo de papel continuo, facendo medrar pouco a pouco a nosa creación común e dando continuidade ao proceso artístico iniciado semanas atrás.

Neste espazo realizamos a lectura do poema “Adiós ríos, adiós fontes” de Rosalía de Castro, conmemorando o Día de Rosalía e integrando a poesía dentro da proposta artística. A escoita atenta e a conexión coa historia de Rosalía engadiron unha dimensión emocional moi especial á sesión.

Para rematar, como sempre, despedimos a actividade saíndo do espazo de maneira individual e tocando libremente unha pequena melodía nas campás, pechando así a experiencia dun xeito tranquilo e significativo.