FOTOGRAFÍA 📸

Con motivo do Día das Artes Galegas xurdiu a iniciativa realizar unha exposición de fotografía conxunta entre os centros educativos de Vilaboa, xa que o homenaxeado deste ano é José Suárez, fotografo galego. 

Por iso, na aula mergullámonos nunha nova experiencia artística: aprender a mirar para poder fotografar. Para iso pedimos a colaboración das familias para crear unha instalación que transformou o espazo nun pequeno museo da imaxe. Cámaras antigas e actuais, fotografías, álbums familiares… Observamos os negativos a través da mesa de luz, as lupas e as lanternas e descubrimos que a fotografía non é só unha imaxe… é luz, é tempo e é mirada. 

Clasificamos as imaxes atendendo ao seu aspecto, e pensamos con que cámara poideron ser feitas cada unha. O servando a evolución da fotografía e das cámaras fotográficas. 

Pouco a pouco fomos entendendo que fotografar non é “premer un botón”, senón escoller que parte do mundo queremos gardar.

Baixo as premisas da exposición: NATUREZA, PATRIMONIO E PAISAXE, aproveitamos as saídas pola nosa contorna para facer fotografías, incluso levamos a cámara á excursión a Escola de Canteiros. 

Hoxe volvemos a sacar a cámara da escola para realizar un PICNIC FOTOGRÁFICO. Preparamos a nosa merenda de mércores antes de saír da escola e puxemos rumbo ao bosque encantado, paseamos pola nosa contorna e merendamos xunto á fonte de Tendes, onde tamén fotografiamos o lavadoiro. Levamos o noso álbum da escola e a cámara de impresión térmica para rexistrar o noso paseo. Miramos o que sempre está ahí… pero esta vez doutro xeito. Agachámonos, achegámonos, afastámonos, probamos encadres diferentes e descubrimos detalles. 

A familia da nosa Mía tamén nos acompañou co seu dron ! 

Este proxecto continúa tamén na casa. Animámosvos a saír, pasear e mirar en familia.

📅 Lembrámosvos que o último día para entregar as fotografías é o luns 9 de marzo.