PLANEA: Sesión 0 📦

 SESIÓN 0: OBXECTOS E CUBRICIÓNS

Este curso escolar, tan cheo de arte e creatividade, o noso CRA foi un dos centros seleccionados para participar na REDE PLANEA a través do proxecto "Lápiz, obxectos e cubricións", unha proposta artística que nos invita a mirar os obxectos cotiáns doutro xeito, a través do xogo, a experimentación e a curiosidade. Ao longo do proxecto, o alumnado achegarase á arte contemporánea mediante accións sinxelas como cubrir, descubrir, observar e imaxinar.

Para comezar, levamos a cabo a sesión 0, na que coñecemos a obra de Christo e Jeanne-Claude, artistas que se adicaban a realizar instalacións artísticas ambientais, empregando grandes teas para envolver edificios e espazos públicos, transformando por completo a maneira de velos.

A partir desta inspiración, iniciamos a sesión observando dous obxectos cubertos con papel e cinta. Que poderían ser? Comezou entón un interesante proceso de investigación: tocamos, ulimos, pasamos os obxectos de man en man e fomos compartindo en voz alta as nosas hipóteses.

Na seguinte parte da sesión, abrimos os dous paquetes. Cada neno e nena abría un pequeno anaco e pasábao á seguinte persoa, ata descubrir finalmente que se agochaba no interior: un peluche da escola e unha chave (obxecto significativo para as seguintes sesións).

Para rematar esta sesión, fixemos unha pequena chuvia de ideas para decidir que obxectos nos gustaría cubrir nós e enviar á outra escoliña do CRA… e, sen pensalo moito, puxémonos mans á obra.

Isto só acaba de comezar… CONTINUARÁ 🎨✏️